Gipahimangnuan sa Public Service Division(PSD)-Iligan ang katawhang Iliganon nga hingusgan ang pagtuman sa husto ug sistematikong pagsegregate sa basura, subay sa Republic Act 9003 o ang Ecological Solid Waste Management Act, aron dili maglisod sa pagproseso sa pag-atiman sa mga basura ang MAA Integrated Waste Management Solution nga nahimutang sa Central Material Recovery and Composting Facility (CMRCF) sa Barangay Bonbonon, Iligan City.
Sumala ni PSD Head Aldwin Cabornay, sa pagkakaron dili pa hingpit operational ang MAA Integrated Waste Management Solution sa Iligan tungod kay nagpadala pa sila og mga sample sa ilang finished product ngadto sa mga kompaniya nga posibleng mogamit sa ilang produkto.
Gidugang pa niya nga nagpadayon ang inspeksyon ug pag-align sa mga makinarya aron masiguro nga hapsay ug lig-on ang operasyon sa pasilidad. Gipasabot usab ni Cabornay nga kinahanglan gihapong i-segragate ang mga basura aron malikayan nga masagulan sa gahi nga mga butang sama sa puthaw nga maka-pahabol ug makadaot sa mga blade sa makina.
Ang maong pahimangno nagtinguha aron mapalig-on ang disiplina sa waste segregation ug masiguro ang limpyo ug epektibong solid waste management sa dakbayan sa Iligan.
