AFP, GISAWAY ANG POST NI BARZAGA KALABOT ALEGASYONG PAGBAHAD NI PBBM SA PENSYON SA MGA SUNDALO

Kusganong gisaway sa Armed Forces of the Philippines (AFP) ang pagpakatag sa sa sayop nga impormasyon nga nag-ingon nga “nagbahad” si Presidente Ferdinand Marcos Jr. nga wagtangon ang pensyon sa mga sundalo.

Kini nunot sa post ni Congressman Kiko Barzaga nga adunay caption nga “Breaking News , President Marcos threatens to remove AFP pension in fear of Military sedition.” Gipamugos sa AFP, nga walay kamatouran ang nasangpit nga pamahayag; malisyo ug gituyo sa pagmugna aron i-brainwash ang katawhan.

Giklaro sa Armadong kusog sa Pilipinas nga walay bisan unsang direktiba, pamahayag, o polisiya nga gikan sa Presidente og bisan unsang ahensya sa gobyerno nga may kalabutan niini. Matod pa nga isip pagmatuod niini padayon nga gipadayag sa administrasyon ang tibuok suporta sa mga uniformed personnel, apil ang pag-atiman ug pagpanalipod sa ilang pensyon ug mga benepisyo.

Pahimangno sa AFP nga ang pensyon sa mga retiradong sundalo protektado sa naglungtad nga balaod. Kini usa ka “earned benefit” nga bunga sa dili moubos sa 20 ka tuig nga matinud-anon, matarong, ug dedikadong pagserbisyo sa nasud.

Sumala sa balaod, mahimong mawala ra ang pensyon kung ang usa ka retiradong sundalo mapamatud-ang nakasala sa usa ka krimen, human sa tukmang proseso ug pinal nga desisyon sa korte. Walay bisan kinsa nga opisyal ang mahimong basta-basta nga magpawalay bili o mag-withhold sa pensyon.

Gihagit sa AFP ang tanang opisyal sa gobyerno ilabi na ang mga napili sa posisyon, nga magmatngon, mosulti ug tinuod, ug magpabilin nga adunay integridad sa pagpaambit sa impormasyon. Gidugang pa nga bisan unsang pagpanghatag ug bakak nga balita nga makadala ug pagkabahin-bahin ug pagkawala sa pagsalig sa publiko dili angay buhaton sa usa ka tinuod nga alagad sa katawhan.

Gipangayo usab sa AFP kang Congressman Barzaga nga undangon ang pagpanghatag sa dis-information nga makadaot sa pagsalig sa publiko ug sa moral sa mga sundalong nagapanalipod sa nasud.

Source: newsinfo.inquirer.net
Photo courtesy to:Philstar.com