Nagpahimangno ang Department of Finance (DOF) nga ang gisugyot sa pagpaubos sa value-added tax (VAT) rate makadaot sa kapasidad sa gobyerno sa pagpondo sa mga serbisyo, nga posibleng moresulta sa pagpangutang sa nasud.
Matod sa DOF, ang pagkunhod sa VAT makapahinay sa revenue stream sa nasud, nga delikado alang sa pagpadayon sa mga importante nga serbisyo publiko lakip na ang sweldo ug benepisyo sa mga empleyado sa gobyerno.
Gipadayag sa DOF nga bisan pa ang kinatibuk-ang Php576-B nga koleksyon sa excise tax, dili gihapon igo aron tabunan ang Php965-B nga kombinadong budget alang sa basic, tertiary, ug technical-vocational education programs. Kini nagpakita sa dako kaayong pondo nga gikinahanglan aron mapadayon ang sistema sa edukasyon sa nasud.
Base sa pinakabag-ong datos sa Bureau of the Treasury, ang kinatibuk-ang utang sa nasud karon misaka na og PHP17.47-T mas taas og PHP120-B kumpara sa giplanong debt ceiling nga PHP17.35-T para sa tuig 2025. Sa fiscal year 2026, gibanabana nga mosaka pa kini og 9.8% ngadto sa PHP19.06-T.
Sa matag adlaw, nagkinahanglan ang gobyerno og PHP18.61-B nga pondo, apan ang kasamtangang koleksyon sa kita moabot lamang og PHP13.65-B matag adlaw, nagbilin og deficit nga PHP4.51-B kada adlaw.
Matod ni Finance Undersecretary Karlo Adriano, ang pagpanaog sa VAT rate makapawala og kapin PHP330- B nga kita matag tuig.
Nagpahimangno usab ang DOF nga kung mapakyas ang fiscal consolidation, posible nga moubos ang credit rating sa nasud, mosaka ang bayronon sa interes, ug mudugang ang utang nga mosangpot sa mas grabe pang krisis pinansyal para sa gobyerno.
PHOTO: Inquirer Business- Inquirer. net
