Gipangandaman na sa kadumalahan sa Local Economic Development and Investment Promotion (LEDIP) Office sa Iligan, pinaagi sa pagpanguna ni Executive Director Marie Grace Halibas, ang mga kalihokan nga nakahan-ay na alang ning bulan sa Oktubre.
Sa usa ka eksklusibong pakighinabi sa Juander Radyo news team, gibutyag ni Executive Secretary Rachel Raval sa LEDIP Office nga usa sa mga nag-unang kalihokan karong bulana mao ang “Investors’ Cocktail”, nga ipahigayon karong Oktubre 28, 2025.
Samtang sa pagkagabie sa maong adlaw, ipahigayon usab ang Iliganon Business Awards. Sa maong kalihokan, nakatakda ang paghatag ug pag-ila/pasidungog sa mga negosyante ug mga investor nga adunay dakong kontribusyon sa kalamboan sa dakbayan sa Iligan. Gidugang pa ni Raval nga karong tuiga, adunay mga bag-ong kategoriya nga gilakip sa awards.
