Nangayo og pasaylo si BJ Saud ngadto sa Energy Development Corporation (EDC) ug First Balfour tungod sa iyang aksyon nga gibabagan ang sakyanan ni First Balfour sa Barangay Ilomavis, Kidapawan City, niadtong milabayng adlaw.
Matod ni Saud, wala siya naka-time in ug time-out pinaagi sa biometric system hinungdan nga wala dayon siya nasuholan sa kompanya sulod sa pipila ka adlaw sa iyang pagtrabaho.
Nagtagbo niadtong milabayng adlaw si Saud ug ang tagdumala sa EDC–First Balfour, aron hisgutan ug sulbaron ang isyu.
Ang maong panagtigom gipangulohan sa mga opisyal sa Manobo Apao Decendants Ancestral Domain of Mt. Apo (MADADMA), Barangay ug BTC isip kabahin sa paningkamot nga masulbad ang dili pagsinabtanay sa malinawon nga paagi.
Kahinumduman, gibabagan ni Saud ang dalan partikular sa RG Pad sa nahisgutang barangay ug wala niini gipasulod ang mga sakyanan sa First Balfour nga usa ka kontractor sa EDC, tungod matod pa nga wala siya nasweldohan ug gikinahanglan na niini ang maong kwarta.
