Gibutyag karon sa National Food Authority (NFA) Zamboanga del Sur nga wala sila nagbaligya ug tag Php20 nga bugas alang sa mga biktima sa kalamidad sa bisan asa nga lugar sa nasud.
Kini ang pagpaklaro ni OIC Branch Manager Rogelio Antonio Lumo sa NFA Zamboanga del Sur human migawas ang mga post sa social media kabahin sa Php20 nga bugas nga gibaligya alang sa mga biktima sa linog sa Bogo City, Cebu.
Gisaysay ni Lumo, sila pabilin nga nagtuman sa ilang mandato sa karon nga mao ang ” BUFFERSTOCKING” ug dili ang ang pagpamaligya sa ilang bugas ngadto sa publiko.
Ilang buhatan igo lang nagpalit direkta ug humay sa mga RSBSA farmers ug ila nga i-pondo sa bodega aron adunay masuplay kung manginahanglan ang ahensya sa gobyerno.
Dugang pa, ang baratong bugas nga gibaligya sa karon napalit na sa naka MOA sa ilang buhatan sama sa DOLE, DA ug FTI ug sila na ang nagsubsidiya aron kini mabaligya ug tag 20 alang sa mga vulnerable sectors.
Gani walay mga personahe sa NFA Zamboanga del Sur nga makita nga anaa sa mga Kadiwa Centers nagdisplay sa baratong mga bugas.
