Patay ang driver sa motorsiklo ug naangol ang angkas niini human mahulog sa gi-repair nga tulay sa National Highway Purok Malipayon, Barangay Bulanit, Labangan Zamboanga del Sur mga alas 3:00 kaganihang kadlawon, October 17, 2025.
Sa report nga nakuha sa Juander Radyo News Team, naila ang biktimang driver nga si Remlanie “Remrem” Pinonggan, 31 anyos,minyo, residente sa Brgy. Limonan, San Miguel, samtang samaran ang angkas nga si Anthony, 17 anyos, nga residente Calube, San Miguel, Zamboanga del Sur.
Sa pamahayag ni Raymond Pinonggan, ang manghod sa driver, gikan ang mga biktima sa vigil sa namatay nilang kabanay sa Brgy. Alindahaw, Tukuran Zamboanga del Sur ug paingon na unta pa-uli sa lungsod sa San Miguel.
Gikataho nga kusog ang pagpadagan sa biktima nga driver hinungdan aksidente kini nga nahulog sa gi-repair nga tulay sa nahisgutan nga lugar.
Gikaingong nabuak ang ulo sa biktima hinungdan sa iyang kamatayon samtang ang angkas nasamdan sa ulo ug daling gidala sa hospital sa pinakaduol nga tambalanan nga padayon pang gi-obserbahan ang kahimtang.
Aminado ang manghod nga nakainom og beer ang biktima nga posibleng kusog ang pagpadagan og wala makabantay sa reflector ug signage nga gibutang sa karsada duol sa tulay hinungdan misangpot sa ilang pagka-disgrasya.
