Gibutyag sa Commission on Elections (COMELEC) nga siyam ka mga kontraktor ang mihatag og campaign donations sa pipila ka mga kandidato sa 2025 midterm elections.
Matod ni COMELEC Chairman George Garcia, wala pa silay kompirmasyon kon aduna bay kandidato nga midaog o napildi sa gihatagan sa siyam ka mga kontraktor og donasyon. Nadiskobrehan kini gikan sa inisyal nga pagtuon sa COMELEC.
Nagpadayon pa ang pagtuon sa mga statement of contributions ug expenditures nga gisang-at sa 66 ka senatorial candidates ug 155 ka party-list groups.
Ilang ihatag ang finalized list sa mga contractor ngadto sa Department of Public Works and Highways (DPWH) alang sa pagsusi sa dili pa kini ipahibalo sa publiko.
Nakalatid sa Omnibus Election Codes nga gibawalan ang mga kandidato nga modawat og mga kontraktor nga adunay kontrata sa gobyerno.
Photo courtesy to:AMAPS -Rappler
