Mipasikat sa kalibotan ang usa ka Indian artist human siya mabutang sa bag-ong Guinness World Record tungud sa paghimo ug pinakagamay nga kahoy nga kutsara, nga adunay gitas-on nga 1.13 mm igo masulod sa mata sa dagom.
Ang maong artist mao si K. Bijay Kumar Reddy, usa ka electrical engineer ug miniature artist nga mas nailhan sa ngalan nga “Odisha Chalk Artist.” Mipasabot nga ang pagbuhat niini maoy resulta sa iyang lalom nga gugma sa arte. Gipildi niya ang miaging rekord nga 1.4 mm.
“Ang proseso lisod ug nanginahanglan ug dako nga pasensya,” matod pa niya. “Bisan ang gamay nga presyur mahimong makaguba sa kahoy.” Gihimo niya ang kutsara gamit ang dekalidad nga kahoy, gagmay nga mga himan, ug gipasinaw kini aron makab-ot ang maayong result.
Plano ni Reddy nga ipakita ang iyang obra sa iyang trabahoan isip simbolo sa pagkamamugnaon, dedikasyon, ug inspirasyon alang sa kabatan-onan aron padayonon ang ilang mga damgo ug molabaw sa mga limitasyon sa ilang abilidad.
Photo Courtesy: Guinness world records
