Nipasidaan sa publiko ang Securities and Exchange Commission (SEC) batok sa pagpamuhunan sa usa ka bag-ong natukod nga negosyo nga giingong nagpakaaron ingnon nga farm goods service provider samtang nangayo og pamuhunan gikan sa publiko nga walay tukmang rehistrasyon.
Nagpasidaan usab kini batok sa mga indibidwal nga nagpaila sa ilang kaugalingon ingon mga representante sa mga stock broker. Sa advisory, ang SEC nagkanayon nga si De Guzman Consumer Goods Trading giingong nag-imbitar sa publiko nga mahimong investor o copartner sa ilang farming ug trading business.
Matod sa corporate watchdog, si De Guzman misaad og 60- ngadto sa 200-porsiyento nga balik kon adunay mo invest sa kompanya sulod sa 30 ngadto sa 60 ka adlaw.
Gipunting sa SEC nga kini nga pagpangdaya giisip nga usa ka kontrata sa pamuhunan, tungod kay kinahanglan nga ipuhunan ang salapi sa De Guzman nga adunay mga gilauman nga kita.
Bisan pa, ang kompanya kinahanglan una nga magparehistro sa SEC sa dili pa ibaligya o itanyag ang mga securities sa publiko. Base sa findings sa SEC, si De Guzman dili rehistrado isip korporasyon o partnership, ug naglihok kini nga dili lisensyado sa pagpangayo ug investment gikan sa publiko, butang nga nakalapas sa Securities Regulation Code.
Ubos sa balaod, ang mga makalapas mahimong pamultahon hangtod sa P5 milyon o mapriso og 21 ka tuig.
Sa samang higayon, nipasidaan usab ang SEC batok sa mga tawo nga naggamit sa mga logo ug mga ngalan sa empleyado ug kompanya sa COL Financial Group Inc. ug Alpha Securities Corp.
Photo courtesy to:Kuripot Pinoy
