Gihingusgan ni City Councilor Aljo Cris Dizon ang prinsipyo sa demokrasya atol sa 15th regular session sa 10th Sangguniang Panglungsod sa Kidapawan City, human nga ang mayorya sa mga miyembro sa konseho mibotar pabor sa pagpadayon sa pagtukod sa Kidapawan City Hospital ug sa paghatag niini og tukmang pondo alang sa implementasyon.
Matod pa ni Dizon, ang maong desisyon usa ka pagpamatood nga naglihok ang demokrasya sa lokal nga konseho, diin matag miyembro adunay katungod nga ipadayag ang ilang opinyon ug moapil sa proseso sa pagboto alang sa kaayohan sa lungsod.
Kahibaloang nahisgutan usab sa sesyon ang Annual Investment Plan (AIP) diin gipresenta ang mga “wish list” nga proyekto nga buot pondohan sa 10th SP. Apan si Councilor Jun Piñol mipadayag sa iyang kabubut-on nga maapil usab sa pundo ang sektor sa agrikultura, nga usa ka mahinungdanon nga bahin sa lokal nga ekonomiya.
Tungod niini, mihangyo si Piñol og win-win solution aron mapadayon ang proyekto sa ospital samtang magahinan gihapon og igong pundo ang agrikultura.
Ang maong diskusyon nagpakita sa aktibong partisipasyon ug balanseng deliberasyon sa mga konsehal alang sa mga programa nga maghatag og benepisyo sa katawhan sa Kidapawan City.
Photo courtesy to:Dizon Pipoy
