Gipahugtan na sa Office of the Senior Citizens Affairs (OSCA) Iligan ang ilang paningkamot sa paglimpyo sa listahan sa mga senior citizens nga benepisyaryo sa pension, human mabisto nga daghan sa kanila ang nakadawat og multiple pensions, bisan pa nga gitagana lamang ang programa alang sa mga indigent o kabus nga seniors.
Gipadayag ni OSCA Head Edgar Navales sa eksklusibong pakighinabi sa Juander Radyo News Team, nga usa sa mga rason sa maong problema mao ang politikal nga koneksyon sa ubang seniors , nga nakaapil sa listahan bisan pa duna na silay mga benepisyo gikan sa GSIS, SSS, ug uban pa.
Nunot niini gipahibalo usab ni Navales nga base sa listahan sa SSS, kapin sa 800 ka senior members ang gi-review, ug ang uban kanila gi-delist na human mapamatud-an nga dili na kwalipikado.
Gisugdan na usab ang joint validation efforts sa Government Communication and Information System (GCIS) ug Philippine Veterans Affairs Office (PVAO) aron masuta usab kung aduna bay mga retired military personnel ang naapil sa indigent pension list.
