Mokabat sa 184, 213 ang ihap sa mga kabataan nga target sa Department of Health (DOH) nga bakunahan dungan sa paglusad sa School Based Immunization (SBI) sa tibuok Zamboanga Peninsula Region, ning bulan sa Octubre.
Matod ni Cristy Ajijul ,National Immunization Program Coordinator sa Department of Health Region 9, ang maong ihap sa mga bata nga bakunahan naglangkob na sa tulo ka grade levels sama sa Grade 1, Grade 4 ug Grade 7.
Gisaysay ni Ajijul, kun basehan ang ihap sa target nga kabataan nga gibakunahan sa nakalabayng tuig 2024 mas taas karong tuig 2025 gumikan kay ang aktwal nga populasyon ang gibasehan sa mga tinun-an nga gikan sa Department of Education (DEPED) Region 9.
Ang School Based Immunization gihimo sa Department of Health matag tuig aron protektahan ang mga kabataan batok sa mga vaccine preventable diseases sama sa measles-rubella, tetanus-diphtheria, (MR-TD)ug human papillomavirus (HPV).
Samtang gipasalig sa Department of Health (DOH) Region 9 nga luwas ug layo sa peligro ang tanang mga bakuna nga ihatag atol sa paglusad sa School Based Immunization sa nagkadaiyang mga tulunghaan sa rehiyon.
