Nakab-ot sa 901st Infantry “Fight ’Em” Brigade ang usa ka dakong kadaugan sa kampanya batok sa insurhensya human nilang mapuhag ang Sub-Region Sentro de Gravidad (SRSDG) Westland, ang nahibilin nga yunit sa Communist Terrorist Group (CTG) sa Caraga Region.
Pinaagi sa sunod-sunod nga focused military operations nga gipangulohan sa 29th, 30th, 36th, 48th, ug 65th Infantry Battalions, nakapukan ug naneutralize ang pwersa ug liderato sa grupo usa ka dakong lakang padulong sa malungtarong kalinaw ug kalamboan sa rehiyon.
Ang Platun Uno sa SRSDG Westland nabungkag human sa serye sa mga engkuwentro sa Surigao del Norte ug Butuan City, diin 18 ka miyembro ang naneutralize, lakip na ang ilang kumander nga si Roderick Maco alyas Rodel. Napugos usab nga mitahan ang 14 ka miyembro, apil ang mga lider nga sila si Ricky Per alyas Rem ug Squad Leader Julia.
Ang pinakabag-ong kalamboan mao ang pagsurender sa duha ka nahibiling miyembro ngadto sa 29IB niadtong Oktubre 2, uban sa pito ka high-powered firearms, nga nagtimaan sa kompletong pagbagsak sa maong platun.
Samtang, ang Platun Dos sa mao gihapong grupo naparalisa human sa engkuwentro niadtong Hunyo 25 sa Lanuza, Surigao del Sur, diin duha sa mga miyembro ang nasamdan ug mitahan dayon. Ang ilang lider nga si Edmar Maca alyas Renren mitahan niadtong Agosto 22, ug pinaagi sa iyang paggiya, nakumbinsi usab niya ang lima pa ka kauban nga mosurender sa unang bahin sa Oktubre, nga nagbilin na lang ug pito ka aktibong miyembro.
Sa kinatibuk-an, 26 ka miyembro sa CTG-SRSDG Westland ang naneutralize sukad Hunyo, ug tulo na lang ka nangaluya nga squad ang nabilin nga kasamtangang na-corner sa utlanan sa Sibagat, Agusan del Sur ug San Miguel, Surigao del Sur. Padayon kini gi-ukoban sa pwersa sa 901st Brigade aron hingpit nang mahunong ang presensiya sa insurgensya sa rehiyon.
Matod ni Colonel Manuel Darius M. Resuello, Acting Commander sa 901st Brigade, padayon nilang palig-onon ang operasyon batok sa nahibiling mga rebelde, ug iyang gi-awhag ang mga miyembro sa CTG nga mosurender sa malinawon nga paagi. Gipasidungog usab niya ang kooperasyon sa mga lokal nga panggamhanan, mga ahensya sa gobyerno, ug mga stakeholders sa ilang pagpasiugda sa kalinaw ug kalamboan sa Caraga Region.
Photo courtesy: 901st Infantry “Fight ‘Em” Brigade, Philippine Army
