Nadakpan na sa mga kapulisan ang usa ka lalaki kinsa mipatay sa usa ka babayeng mabdos sa Barangay Ludiong, Dinas, Zambonga del Sur, niadtong nakalabay nga adlaw. Naila ang dinakpan nga si “Roland” 37 anyos, usa ka Poultry Caretaker ug residente sa lugar.
Kahinumduman niadtong Octobre 2 ning kasamtangang tuig si Roland maoy gitudlong responsableng mipatay sa biktima gamit ang calibre 38 revolver.
Subay sa report ang biktimang si “Cheryll” igo lang mitambag sa iyang bayaw nga undangon na ang pag gamit sa illegal nga druga apan nasuko ang suspect ug didto gipusil ang biktima hinungdan sa iyang hinanaling kamatayon.
Human sa maong krimen misibat pa ang maong suspect apan kagahapong adlawa nadakpan ra kini sa mga kapulisan sa Dinas MPS kauban ang 2nd ZSPMFC, ZSPIU, sa pakig-alayon sa 53IB Alpha Company.
Samtang nakuha sa suspect ang calibre 38 revolver nga puno kini sa mga buhing bala. Sa karon ang dinakpan nakakustodiya na sa Dinas Municipal Police Station, ug posebling mag-atubang na kini sa kasong may kalabutan sa Republic Act 10591 tungod sa pag hupot sa illegal nga armas ug sa kasong murder.
Photo Courtesy to:Dinas Municipal Police Station
