Misurender ang duha ka labing taas og ranggo nga lider sa New People’s Army (NPA) ngadto na sa 36th Infantry (Valor) Battalion sa Sitio Cagpangi, Barangay Cabangahan, Tago, Surigao del Sur niadtong nakalabay nga adlaw.
Ang duha ka misurender giila nga sila si Demar Quinonez Montenegro alias “Jansen,” nga Vice-Commanding Officer sa Platoon 2, Sub-Regional Sentro de Grabidad (SRSDG) sa Northeastern Mindanao Regional Committee (NEMRC), ug si Jacheel Canon Ayoste alias “Riza,” nga medic sa samang yunit. Ang duha regular nga miyembro sa Communist NPA Terrorists (CNTs) ug gikonsiderar nga priority targets tungod sa ilang papel sa grupo.
Sumala ni Lieutenant Colonel Joselito B. Ante Jr., Commanding Officer sa 36IB nga human sa ilang pagsurender, mitug-an ang duha sa mga lokasyon sa ilang gitaguan nga armas ug eksplosibo. Sa gihimo nga follow-up operation sa 36IB sa susamang adlaw, narekober ang mga mosunod nga war materiel: Usa (1) ka M16 Rifle; Usa (1) ka AK-MS Soviet-type Assault Rifle; Tulo (3) ka Rifle Grenades; Kinse (15) ka live ammunition sa 7.62mm; Duha (2) ka long steel AK magazines; Ug assorted medical paraphernalia.
Ang maong mga armas ug gamit, gituohang gigamit sa grupo sa ilang operasyon sa kabukiran sa Tago ug mga kasikbit nga lugar. Giingon ni LTC Ante Jr. nga ang maong pagsurender nagpakita sa epektibong koordinasyon tali sa militar ug lokal nga panggamhanan.
Padayon ang Philippine Army pinaagi sa 36th Infantry Battalion, uban sa lokal nga panggamhanan ug mga ahensya sa gobyerno, sa pagpang-awhag sa ubang miyembro sa CTG nga mosurender ug mopahimulos sa Enhanced Comprehensive Local Integration Program (E-CLIP) ug Amnesty Program hangtod Marso 2026.
Ang programa nagtanyag og pinansyal, panginabuhian, ug reintegration assistance alang sa mga kanhing rebelde nga gustong magsugod pag-usab ug mamuyo sa malinawon nga paagi.
Photo courtesy: 36th Infantry “VALOR” Battalion, Philippine Army
