Nanawagan ang civic advocacy group nga CitizenWatch Philippines sa gobyerno nga pakgangon ang ilegal nga pagbaligya sa sigarilyo nga matud pa makadaot sa kahimsog sa mga Pilipino ug mokunhod sa pundo sa gobyerno alang sa serbisyong medikal.
Gipunting ni Orlando Oxales, lead convenor sa CitizenWatch ang resulta sa Pulse Asia survey diin 57% sa mga Pilipino ang nasayod sa pagbaligya sa ilegal nga sigarilyo, samtang 71% usab ang miingon nga mas gipili nila kini tungod kay mas barato.
Gipasidan-an ni Oxales nga nausik ang bilyon-bilyong pesos nga unta adto mopaingon sa mga programa sa panglawas tungod sa pagkusog sa black market.
Dugang pa niya, ang nasud nahimong “hotbed” sa smuggled cigarettes, nga nakapukaw sa korapsyon ug pagkusog sa organisado nga krimen.
Kalabot niini, nanawagan ang grupo og mas hugot nga pagpatuman sa balaod, full-scale prosecutions, ug paggamit sa modernong digital tracking systems aron gub-on ang supply chain ug mabawi ang nawala nga kita sa gobyerno.
Base sa datos sa Philippine Tobacco Institute (PTI), niabot na sa record high ang illicit cigarette trade sa nasud karong tuiga, diin usa sa matag lima ka sigarilyo ang wala mabuhisi ug wala marehistro.
Tungod niini, nahulog ang tobacco excise revenue sa gobyerno gikan sa ₱176 bilyones niadtong 2021 ngadto sa ₱134 bilyones niadtong 2024.
Photo courtesy: Citizen Watch
