Misayaw ang mga kolorful ug makusganong grupo sa kalsada karong adlawa,Sabado ,Setyembre 27,2025, atol sa gipahigayon nga Street Dancing Competition, usa sa mga highlight sa Diyandi Festival 2025 sa siyudad sa Iligan.
Nagsugod ang kalihokan gikan buntag hangtod hapon, diin nagtapok ang liboan ka mga Iliganon ug bisita aron saksihan ang makalingaw ug makabungog nga mga sayaw nga puno sa tradisyon, kultura, ug relihiyosong simbolismo.
Nagpasundayag ang napulo ka mga partisipante gikan sa nagkalain-laing barangay ug eskwelahan, nga nagdala sa tema nga “Paghiusa sa Kultura ug Panan-aw sa Maayong Kaugmaon.”
Ang mga grupo misayaw uban sa tradisyonal nga sinina, madasigon nga musika, ug makasaysayang koreograpiya nga nagpakita sa kusog ug kadasig sa katawhang Iliganon.
