Gipadayag sa Securities and Exchange Commission (SEC) ang pagsuporta sa mga sugyot nga usbon ang bank secrecy law aron matubag ang isyu sa korapsyon sa gobyerno ug mapalapdan pa ang gahum sa SEC sa imbestigasyon.
Gipunting ni SEC chairperson Francis Lim ang korapsyon isip usa ka dakong kabalaka para sa lokal ug langyaw nga mga investors.
Gipasabot sa SEC nga adunay pipila ka balaodnong panukid nga pending sa House of Representatives alang sa pagtangtang sa bank secrecy law, nga nagtinguha sa pagpalambo sa transparency ug pag-atubang sa korapsyon.
Ang mga amendamento nagtinguha nga hatagan ug gahum ang Bangko Sentral ng Pilipinas (BSP) sa pag-usisa ug pagsusi sa mga deposito kung adunay makatarunganong basihanan nga nagapakita nga adunay panikas, seryosong iregularidad, o iligal nga kalihokan nga gihimo sa mga stockholder, tag-iya, direktor, trustee, opisyal, o empleyado sa mga gi-supervise nga institusyon.
Matod pa ni Lim, ang pagkahimo nga makasulod sa kritikal nga impormasyon pinansyal—ilabi na sa mga kaso sa insider trading, market manipulation, ug investment fraud—makapalig-on pag-ayo sa enforcement capabilities sa SEC.
Sumala sa SEC, ang Secrecy of Bank Deposits Act o Republic Act (RA) 1405 kasagaran gigamit isip panalipod sa mga tag-iya sa bank accounts sa mga kaso nga adunay kalapasan sa Securities Regulation Code ug sa Revised Corporation Code of the Philippines, nga naglimit sa enforcement capacities sa komisyon.
Photo courtesy to:Inquirer. net
