Nagpahimangno ang awtoridad ngadto sa mga nagapamaligya og karne sa merkado nga siguruhon permi nga presko ang ilang ginabaligya nga karne tungod kay makadaot sa panglawas kung ugaling makakaon og daot o unsafe nga karne ang mga mamalitay.
Pagpasabot sa City Veterinary Office nga gawas sa magdala og kadaot ngadto sa panglawas sa katawhan, aduna usab kini tulubagon sa balaod ang mga meat vendor nga nagapamaligya og unsafe nga mga karne subay sa Republic Act 9296 kon Meat Inspection Code of the Philippines nga posibleng magresulta sa pagtangtang sa ilahang business permit.
Bag-uhay lang, kapin sa tres sintos ka kilo sa assorted ug dressed chicken meat nga ginabaligya diha sa Cogon Market ang nakompiska sa Meat Inspection Division sa City Vet human nga gireklamo tungod lain na kini ug baho ug danlog na ang karne.
Sumala pa ni Dr. Darryl Rasay, Assistant Department Manager sa City Vet ang nakompiskang mga karne gidala na didto sa disposal area sa City Vet nga nahimutang sa Barangay Pagatpat ug gisunog.
Gawas sa pahimangno sa mga nagapamaligya, nga siguruhong limpyo ug luwas ang ilahang produkto, giawhag sab ang mga konsumante nga mag-igmat ug dili magpataka sa pagpalit labi na pagreport sa awtoridad kung adunay masinati nga susamang insidente.
Photo courtesy: City Information Office
