Nasakmit sa kapulisan ang kapin ₱1.1 milyones nga balor sa gituhang smuggled cigarettes atol sa gihimong operasyon sa mga sakop sa 2nd Lanao del Norte Provincial Mobile Force Company, SND Municipal Police Station, ug sa Provincial Intelligence Unit, ning miaging gabie , Setyembre 22, 2025, sa lungsod sa Sultan Naga Dimaporo, Lanao del Norte.
Gikasa ang operasyon human makadawat og sumbong ang kapulisan gikan sa usa ka nagpakabanang residente. Nakaplagan ang mga sigarilyo sa usa ka sagingan sa Purok 8, Barangay Bauyan, mga lima ka metros ang gilay-on gikan sa national highway kung asa gitabonan kini og trapal.
Tungod sa kusog nga ulan ug delikadong kondisyon sa lugar, gikarga ang mga butang ug gidala ngadto sa Barangay Hall sa Purok 2, diin gihimo ang imbentaryo kauban ang mga barangay officials, BPAT, ug RHU personnel.
Mokabat sa 1,400 ka reams sa mga sigarilyo nga nasakmit sa mga awtoridad nga gibanabana nga mobalor ug ₱1,187,200,00
Gidala ang mga nakumpiskar nga butang sa Sultan Naga Dimaporo Municipal Police Station alang sa dokumentasyon ug tukmang lakang
Nunot niini gipasidunggan ni PCOL Leo De Leon Sua, Acting Provincial Director sa Lanao del Norte Police Provincial Office , ang paspas nga aksyon sa mga operatiba ug gipasalamatan ang concerned citizen nga mihatag sa impormasyon.
Photo courtesy of FBLanaodelNortePNPHqs
