Natuman ang damgo sa French chef nga si Youssef El Gatou nga mahimong world record holder human nahimo niya ang pinakataas nga strawberry cake sa France, nga natala sa Guinness World Record.
Sa tabang sa baynte ka chef, gihimo ni El Gatou ang masterpiece nga miabot og usa ka semana aron mahuman. Ang cake, nga gibutang ibabaw sa usa ka ice rink, adunay gitas-on nga 399 ka tiil ug 7.27 ka pulgada. Nalabwan niini ang miaging record nga gipanag-iya sa Municipality of San Mauro Torinese sa Italy.
Apil sa mga sangkap nga gigamit ang 4,000 ka itlog ug daghang asukal ug cream. Kinahanglan usab niyang atubangon ang mga hagit sama sa paggamit og blowtorches aron pagpainit sa mga bowl alang sa paghalo sa cream. Ang mga strawberry gikan pa sa mga uma nga hapit upat ka oras ang gilay-on sa amihanang bahin sa France.
Gipili ni Youssef ang strawberry cake kay gituohan niya kini nga usa ka classic French dessert. Sumala sa pastry chef, ang sekreto sa usa ka lamiang strawberry cake mao ang humok nga sponge cake diin ibutang ang mga strawberry.
Human makumpirma ang record, gipang-apod-apod ang cake sa publiko atol sa selebrasyon nga gitambongan sa daghang miyembro sa Moroccan community sa France. Ang uban pang bahin sa cake gihatag usab sa mga duol nga retirement homes, ospital, mga bumbero, ug Red Cross.
Photo courtesy: Morocco world news
