GIPAHAYAG sa Department of the Interior and Local Government (DILG) Zamboanga del Sur Provincial Office ang hundred percent nga pagpatuman sa mga proyekto ilawom sa Support to Barangay Program diha sa nagkadaiyang Local Governmet Unit (LGU) ug wala silay ghost projects.
Matud ni DILG Zamboanga del Sur OIC- Provincial Director Dave Barrot, ilahang buhatan pinaagi sa Project Development and Management Unit (PDMU) hugot nga nagmonitor ug nag-evaluate sa mga nagkadaiyang mga proyekto aron sakto ang pagpatuman niini.
Gisaysay ni Barrot, daghan silang mga dokumentasyon isip pagpamatuod nga napatuman nilang tanan ang mga proyekto nga malipayon usab nga gidawat sa mga recipient sa kabarangayan sa Zamboanga del Sur.
Ang Support to Barangay Development Program (SBDP) gitumong aron paghatag sa gikanahanglan suportang pangkalambuan pinaagi sa paghatag ug mga infrastructure projects ug social services alang sa komunidad nga kanhing may presensya sa CPP-NPA.
