Gipasigarbo sa Technical Education and Skills Development Authority (TESDA) Region 9 ang nakuhang gold medal sa us aka competitor nga Zambusorian atol gipahigayong World Skills ASEAN Competition sa World Trade Center, Pasay City, ning bag-o.
Matud ni TESDA 9 Regional Director Tarhata S. Mapandi, CESO III, ang maong competitor kanhi nang naka-angkon ug gold medal sa Philippine National Skills Competition hinungdan siya ang gipadala sa World Skills ASEAN Competition.
Gisaysay ni RD Mapandi, resulta sa iyang mga paningkamot sa nakalabayng national skills competition mao ang pag-angkon sa lima ka mga award sa mga competitor sa lain-laing mga kompetisyon nga naggikan sa Zamboanga Peninsula.
Kahinumduman, consistent nga na-angkon ni Honorato Amad II, taga lungsod sa Molave, Zamboanga del Sur ang gold medal sa Cabinet Making sa tanang mga kompetisyon nga iyang gina-apilan gikan pa sa ubos nga lebel.
Dili lang garbo sa Zamboanga del Sur o sa rehiyon 9 ang na-angkon nga kadaugan sa maong competitor, apan lakip na sa tibuok Pilipinas gumikan kay siya ang mag-inusarang ipadala sa Pilipinas sa Carpentry skills sa World Skills Competition nga pagahimoon sa China.
