Gi-awhag sa Lokal nga Pangamhanan sa Kidapawan ang tanang tourism-related establishments ug stakeholders nga makigduyog sa selebrasyon sa World Tourism Month nga ipahigayon sa Setyembre 30, 2025 adlaw’ng Martes, ala 1:00 sa hapon sa City Gymnasium.
Ang maong kalihokan adunay tema nga “Tourism and Sustainable Transformation”, nga nagtinguha sa pagpasiugda sa malungtarong turismo ug paglambo sa sektor niini sa dakbayan.
Gilauman nga moduyog sa selebrasyon ang nagkadaiyang establisemento ug sektor nga adunay kalabotan sa turismo sama sa Accommodation (Hotels, Inns, Vacation Home Rentals, Resorts, Food Sector o Restaurants, Food & Beverage, Travel Agencies, Tour Operators, Event Organizers, Shopping Centers, Health & Wellness, Farm Tourism Sites, Transportation Sector).
Gipahibalo usab sa LGU nga ang Certificate of Attendance ipanghatag human sa kalihokan ug kini usa ka requirement nga susihon sa oras sa renewal sa business permits.
Kini nga aktibidad usa ka pamaagi sa dakbayan aron mapalambo pa ang turismo ug mapaabot sa mas daghang katawhan ang mga oportunidad nga dala niini.
Photo courtesy to:City Government of Kidapawan
