Kusganong gikondenar sa Bukidnon Police Provincial Office sa pinakataas nga termino ang brutal nga insidente sa pagpamusil nga nahitabo mga alas 11:44 sa buntag niadtong Septiyembre 10, 2025, sa Purok 7, Barangay Vintar, Valencia City, Bukidnon, nga miresulta sa hinanaling kamatayon nila Godofredo Macahilig Jardinico ug Jeric Asis Paskin, parehong residente sa Barangay Kahaponan, sa maong syudad.
Base sa gipagula nga statement sa kapulisan kining maong krimen walay dapit sa komunidad sa probinsya ug gipasalig sa publiko nga gihimo nila ang tanan paningkamot aron magukod ang mga suspetsado ug mahatagan sa hustisya ang mga pamilya sa biktima.
Nagpadayon karon ang hot pursuit operation, inubanan sa dragnet operations nga nakig-coordinate sa duol nga police stations.
Dugang pa, ang Scene of the Crime Operatives (SOCO) gihangyo nga mohimo og hingpit nga imbestigasyon sa crime scene aron maestablisar ang mga kamatuoran ug makatigom og mga mahinungdanong ebidensya.
Gipahimangnuan usab ang publiko nga magpabiling kalmado, mabinantayon, ug makig-koordinasyon pinaagi sa paghatag bisan unsa nga impormasyon nga makatabang sa paspas nga kasulbaran sa kaso
via: Bukidnon Police Provincial Office
