Gipahigayon ang 3rd Quarter Nationwide Simultaneous Earthquake Drill (NSED) 2025 sa Dinas, Zamboanga del Sur, adlaw’ng Huwebes, Septyembre 11, 2025.
Gipasiugdahan ang kalihokan sa Office of Civil Defense 9 sa pagpanguna ni OCD 9 Regional Director Atty. Ruel Halanes nga gitambungan sa mga local MDRRMOs, LDRRMOs, BFP personnel ug mga LGU officials.
Tumong sa NSED nga mapasiugda ang kaandam sa posibleng masinati nga katalagman sa komunidad. Gipasiugda sa NSED ang mahitungod sa pagpangandam sa linog ug sa hustong pagpahigayon sa “duck, cover and hold” procedure.
Mapasalamaton usab si OCD IX Regional Director Atty. Halanes sa tanan nga mga misalmot sa maong kalihukan kay kini timailhan sa lig-ong suporta sa mga stakeholders ug LGUs.
Kinahanglan matud pa nga ipadayon ang nasugdan nga kalihukan arun nga mapangandaman ang unsa man nga mga posibleng masinati nga mga kalamidad sa Zamboanga Peninsula.
Photo courtesy to:Office of Civil Defense 9
