Nabiktima sa online scam ang usa ka 80 anyos nga babaye gikan sa Hokkaido, Japan, human siya nakapadala ug halos usa ka milyon yen o $6,700 dollars ngadto sa usa ka tawo nga nagpakaaron-ingnong astronaut.
Sumala pa sa taho, ang maong tawo matud pa na-trap sa kawanangan ug nanginahanglan ug kuwarta alang sa oxygen.
Nakaila matud pa niya ang scammer pinaagi sa social media niadtong Hulyo ug mituo siya sa istorya nga kini kuno tua sa spaceship ug “giatake.”
Samtang nagkadugay ang ilang panagstorya, nakasinati pa gayud ug pagbati ang maong lola ngadto sa peke nga astronaut, mao nga nakumbinsi siya nga magpadala ug kuwarta gamit ang prepaid systems sa lain-laing tindahan.
Sa dihang nagsugod siyang magduda, didto na niya gisulti sa pamilya ug gireklamo sa kapulisan. Sumala pa sa mga awtoridad, talagsaon ra ang ingon ani nga online romance scam ug gamay ra kaayo ang tsansa nga mabalik pa ang kwarta. Mao nga ilang gipagawas ang kaso isip pahimangno sa uban, labi na sa mga tigulang nga sayon lang mailad.
Photo courtesy to fossbytes’s
