Nagviral ang usa ka talagsaong serbisyo karon sa Japan nga naila sa ngalan nga “Handsome Weeping Boys.”
Sa kantidad nga 7,900 yen, o katumbas sa P3,800, mahimo nimong ma-hire ang usa ka guwapong lalaki nga mouban kanimo samtang ikaw naghilak, maminaw sa imong mga problema, ug mopahid pa sa imong mga luha gamit ang tissue.
Gikan kini nga serbisyo sa ideya ni Hiroki Terai, kinsa nasayod sa kalisod sa daghang Hapones sa pagpadayag sa ilang gibati tungod sa taas nga pressure sa trabaho ug personal nga kinabuhi.
Matod ni Terai, usahay igo lang gyud nga adunay maminaw ug moila sa imong gibati aron mahatagan ka og kahupayan sa emosyonal nga bahin.
Makapili ang mga kustomer gikan sa usa ka online catalog nga adunay unom ka lainlaing ikemeso boys, usa ka termino nga nagpasabot sa guwapong mga lalaki nga andam mouban ug mohilak.
Kung buot sa kliyente, motan-aw pa sila og makapaguol nga mga video aron mas daling mogawas ang emosyon ug makahilak.
Sukad sa paglusad sa serbisyo, halos dili na mapugngan ang mga inquiries gikan sa mga interesado.
Nagpakita kini nga adunay tinuod nga panginahanglan alang sa ingon nga matang sa emosyonal nga suporta sa modernong katilingban sa Japan.
Photo Courtesy to: the post ph
