Angol ang usa ka 57-anyos nga babaye human gibanggaan sa usa ka motorsiklo samtang nitabok sa dalan sa Purok 4, Brgy. Matilo, Nabunturan, Davao de Oro, pasado alas 9:40 sa buntag niadtong nakalabay nga adlaw.
Subay sa report ni PSMS Barry A. Castillo ang Traffic Investigator sa Nabunturan MPS, nisibat ang driver nga giila sa alyas dodong, 36 anyos, minyo, ug residente sa Brgy. Camalangan, New Bataan, human sa nahitabo.
Apan, misurender ra usab siya sa kapulisan pagkahuman sa insidente. Giila ang biktima sa alyas Inday , minyo ug taga Brgy. Matilo, nabanggaan sa usa ka Motorstar 150 nga motorsiklo nga walay plaka ug gimaneho ni alyas dodong nga walay lisensya.
Gikan ang motorsiklo sa Brgy. Poblacion, Nabunturan ug padulong sa Camalangan, New Bataan, via Maragusan provincial road.
Naangkon sa biktima ang samad sa lawas ug daling gihatod sa NERT ambulance ngadto sa Davao de Oro Provincial Hospital (DDOPH), Montevista.
Apan, gibalhin kini sa DRMC, Tagum City, para sa dugang medikal nga atensyon ug padayon pa usab ang mga awtoridad sa pagsuta sa kasamtangang sitwasyon sa biktima hilabina nga anaa kini sa kritikal nga kondisyon.
Dugang pa nga adtong Septyembre 8, 2025 nagkauyon kini nga mag amicable settlemnt ang suspek ug ang tagtungod sa biktima.
Photo Courtesy to: PNP Nabunturan
