Nahimong simbolo ang usa ka lalaki sa Brazil sa tinuod nga kalig-on ug pagkamatinud-anon sa trabaho. Naila nga si Walter Orthmann, nagsugod sa trabaho isip packing assistant sa usa ka textile company niadtong 1938 sa edad nga 15 anyos pa lamang.
Apan ang makapatingala, hangtod sa tuig 2022, nagpabilin siya sa mao gihapon nga kompanya ug nakatala og 84 ka tuig ug 9 ka adlaw nga serbisyo.
Tungod niini, gipasidunggan siya sa Guinness World Records isip “Most Loyal Employee in the World.” Sumala ni Orthmann, ang nagpadayon sa iyang dedikasyon mao ang pagbaton og katuyoan kada adlaw, maayong relasyon sa mga kauban, ug ang iyang abilidad sa pag-angay sa mga kausaban sa panahon.
Matud pa niya, “Kung ganahan ka sa imong ginabuhat, dili nimo mabati nga trabaho na siya.”
Si Walter Orthmann namatay niadtong tuig 2024 sa edad nga 102, apan ang iyang legacy nagpabilin isip modelo sa tinuod nga katagbawan ug dedikasyon sa panarbaho.
Sa panahon karon nga dali na lang ang balhinay og trabaho, ang istorya ni Walter nagpahinumdom nga ang kalipay dili sa bag-ong oportunidad lang makaplagan, kundi usahay, diha ra sa pagtan-aw sa kahulugan sa imong ginabuhat matag adlaw.
Photo courtesy of PEP.ph
