Gidakop sa kapulisan sa Osaka, Japan niadtong Abril 2021 ang usa ka 39-anyos nga lalaki nga nailhan nga si Takashi Miyagawa human madiskubrehan nga nakigrelasyon kini sa 35 ka kababayen-an aron makadawat og daghang regalo.
Gilimbongan ni Miyagawa ang mga biktima pinaagi sa pagsulti og lain-laing petsa sa iyang adlawng natawhan gikan Pebrero hangtod Nobyembre aron mohatag ang kada nobya niini og regalo. Ang kantidad sa tanang butang nga iyang nadawat miabot og ¥100,000 o kapin ₱45,000, lakip na ang mahal nga sinina ug usa ka suit.
Daghan sa mga biktima iyang nakaila pinaagi sa iyang trabaho isip marketing staff. Apan sa dihang nasuta na ang kamatuoran, nagkahiusa ang mga kababayen-an nga nagmugna og asosasyon sa mga biktima aron ipasaka ang kaso batok kaniya.
Gipangayo sa publiko sa Japan ang hustisya, dili lang tungod sa kantidad sa mga regalo, kondili tungod sa pagpang-abuso sa pagsalig ug pagbati sa daghang kababayen-an.
Photo courtesy to: telegrafi
