Nakadawat ug pasidungog ang usa ka higanteng talong nga sama kadako sa bola sa basketball didto sa Pennsylvania, U.S.A. Kini ang giila nga labing bug-at nga talong sa tibuok kalibutan human kini mitimbang sa 3.9 ka kilo.
Ang maong talong gipanag-iya ni Erik Gunstrom, nga dugay na nakigkompetensya sa pagpatubo ug higanteng mga utanon, una sa tanan mao ang mga kalabasa. Ang rekord giila mismo sa mga eksperto gikan sa Great Pumpkin Commonwealth.
Mas makapahibulong, duha ka talong ang gisumiter ni Gunstrom sa kompetisyon ug parehas kining duha milabaw sa karaang rekord. Ang liso nga gigamit gikan sa kanhi record-holder nga si Peter Glazebrook, kini nagpakita sa panaghiusa sa komunidad sa mga grower. Tambag ni Gunstrom sa mga gustong mosulay: “Higugmaa lang ang imong gibuhat!”.
Photo Courtesy: reddit.com
