Subling nagpahimangno ang Technical Education and Skills Development Authority (TESDA) Zamboanga del Sur sa tanang mga jobseeker sa paglikay sa pagkuha ug mga peke nga “National Certificates”.
Kini subay sa gipadayag ni TESDA Specialists II, Engr. Don Mark Dalid atol sa pakighinabi sa Juander Radyo News Team bag-ohay pa lamang.
Gisaysay ni Engr. Dalid, usa ka indibidwal nga naggamit ug peke nga national certificates ilang nasapon gumikan mao kini ang gipresentar sa ilang buhatan aron pagrenew sa NCs.
Sa karon gipailawom na sa TESDA Zamboanga del Sur ug imbestigasyon ang peke nga NCs nga ilaha nga nakumpiska.
Sigun pa ni Engr. Dalid kining maong buhat maoy usa ka seryosong paglapas sa mandato sa TESDA sa paghatag sa dekalidad nga assessment ug certification sa mga mipasar sa training.
Posibleng ma-blacklist pa ang usa ka aplikante nga masuta nga peke ang dala niining certificate sa pag-apply tungod kay walay laktod ang pagkuha ug national certificates.
