Wala pa makauli hangtod karon ang 7 ka indibidwal human managat sa kadagatan sa Mati kaniadtong Agosto 20, 2025. Matud pa nga gilaumang moabot unta kini sa Barangay Nangan, Governor Generoso, Davao Oriental apan wala na kini mipauli, hinungdan sa daling pagkasa sa Coast Guard Station Davao Oriental og search and rescue operation kagahapong adlawa, Agosto 31, 2025.
Nasayran nga ang nawala nga mga mangingisda mao ang mga mosunod: Renante Baring, 52 anyos; Jay Harold Baring, 19 anyos; Renante Baring Jr., 31 anyos; Julito Baring, 24 anyos; Marlon Meralles, 45 anyos; Ronnie Meñeza, 19 anyos; ug Donel Dampong, 32 anyos. Sakay sila sa Triple Z nga motor banca nga kolor berde ug puti nga adunay SSEN number 031823-01001.
Tungod niini, gi-awhag sa Coast Guard ang tanang water vessel o sakyanang pandagat nga naglawig sa maong kadagatan nga dali gilayon motaho kung adunay impormasyon may kalabutan sa pito ka mga mananagat.
Sa karon, padayon gihapon ang gihimong search and rescue operation sa Coast Guard Davao Oriental aron hatagan og kahupayan ang gibating kabalaka sa mga pamilya sa mga biktima.
