Dead on the spot ang usa ka lalaki human kini gipusil sa makadaghang higayon bandang alas-5 sa buntag, Agosto 24, 2025, atbang sa Tagum City Public Market.
Giila kini sa kapulisan sa Tagum City Police Station nga usa ka Albert Antolihao Razonabe, 36 anyos, minyo, kinsa residente sa Prk. Sto. Niño, Brgy. Magugpo West sa syudad.
Subay sa impormasyon, nakit-an sa biktima ang igsoong lalaki sa palengke hinungdan nga mibaktas kini aron magkuha ug isda, apan usa ka suspek ang miduol dayon kablit sa armas ug punting sa nagkadaiyang bahin sa lawas niini hinungdan sa iyang hinanaling kamatayon, samtang abtik usab ang suspetsado sa pagsibat sa wala matinong direksyon.
Igo na lamang midangoyngoy ang live -in partner ni Razonabe nga si Sheila Diputado kinsa kauban niini sa maong higayon padulong unta sa Digos City.
Mihimo na og aksyon ang mga awtoridad sa dakbayan kalabot sa naasoy nga krimen aron mapanubag ang responsable niini.
