Patay ang usa ka mananagat human kini gipusil sa amahan sa iyang nakalalis nga menor de edad sa Purok Buisan, Barangay Tarakan, Dinas, Agosto 19, 2025.
Ang biktima naila sa alyas “Javanni”, hingkod ang panuigon, samtang ang suspetsado naila sa alyas “Allan”, 38 anyos, mag-uuma ug parehong residente sa nahisgutan nga lugar.
Sa inisyal nga imbestigasyon sa kapulisan, unang nahitabo ang komosyon tali sa biktima ug usa ka menor de edad apan nabadlong ra sa barangay officials.
Bisan sa gihimo nga pagbadlong sa barangay officials, mihimo ug komprontasyon ang amahan sa menor de edad ngadto sa biktima nga misangpot sa pagpamusil sa suspetsado.
Naka-angkon ug samad pinusilan ang biktima sa wala gibutyag nga parte sa lawas ug gani misulay pa kini ug dagan palayo sa suspetsado apan wala na niini nahimo gumikan sa na-angkon nga samad pinusilan.
Human sa hitabo ang suspetsado boluntaryo nga mitahan sa mga miresponde nga PNP personnel, samtang sa pagkakaron nakakustudiya na sa Dinas Municipal Police Station.
source: Dinas Municipal Police Station
photo for illustration credits to:ada derana
