KIDAPAWAN CITY- Gidagsa sa mga residente sa Barangay Mua-an ang baratong bugas nga gi-tanyag sa City Agriculture’s Office atol sa KDAPS 4.0 niadtong Martes, Agosto 5, 2025.
Sa kantidad nga P50.00, makapalit na ang mga lumulupyo og tulo ka kilo nga bugas, nga mas barato kumpara sa kasamtangang presyo sa merkado.
Sumala sa City Agriculture Office, ang maong bugas susama og kolor sa denorado rice apan usa lang ka klase sa commercial rice nga dugay na nga gitambak sa ilang bodega.
Gipahayag sa opisina nga imbis ilabay, ila kining gipahimuslan nga mabaligya sa katawhan kay mapuslan pa ug luwas pa nga makaon.
Matud pa, bisan ang mga empleyado sa Lokal nga Panggamhanan mamalit usab niini ug wala’y kalainan sa mga baligya sa mga pampublikong merkado.
Ang maong bugas mapalit lamang matag aduna’y KDAPS nga kalihukan sa lain-laing barangay.
Gawas sa bugas, gibaligya usab ang preskong Tilapia ug baratong utanon nga gikan mismo sa mga mag-uuma sa Kidapawan City pinaagi sa Buy Back Program, usa ka inisyatiba aron masuportahan ang lokal nga produksyon sa agrikultura.
Photo credits: City Government of Kidapawan
