PAGADIAN CITY- Patay ang tulo ka mga indibidwal human nawad-an ug brake ang 12 wheeler truck hinungdan nahulog sa may pampang nga bahin sa Barangay Maragang, Tigbao, Zamboanga del Sur, niadtong Agosto 4, 2025.
Kini subay sa gibutyag nga impormasyon ni SFO3 O’Bryan Pranza, Municipal Fire Marshal sa Tigbao Municipal Fire Station atol sa pakighinabi sa Juander Radyo News Team.
Gisaysay ni SFO3 Pranza, atol sa retrieval operation nga una nilang narekober ang patay’ng lawas sa usa ka pahinante nga nailang si Nonie Mandas, 32 anyos, taga lungsod sa Dumingag, Zamboanga del Sur.
Ug sunod nila narekober ang laing duha ka patay’ng lawas nga gilangkuban sa driver nga nailang si Jonel Gumapac, 43 anyos, taga lungsod sa Dumalinao, ug ang laing usa nga nailang si Tata Nelmida, 49 anyos, lumulupyo sa Danlugan, Pagadian City.
Samtang, duha sab sa mga sakay sa maong 12 wheeler truck ang luwas ra apan naka-angkon ug mga samad ug bun-og sa lawas nga naila nga sila si Markjames Baleaso, 29 anyos, gikan sa lungsod sa San Pablo ug si Jomar Jumuad, 28 anyos, lumulupyo sa Sto. Nino, Pagadian City.
Matud ni SFO3 Pranza, dapit alas 8 sa buntag nahuman ang retrieval operation alang sa ubang mga biktima gumikan sa kabug-at sa mga sakyanan nga naka-ipit ug nakadat-og sa duha ka patay’ng lawas nga nahibilin sa lugar nahitabuan.
Sa karon ang mga patay’ng lawas sa tulo ka mga indibidwal anaa na sa usa sa mga funeral homes sa syudad sa Pagadian, samtang ang duha nga angol gidala na sab sa tambalanan aron madapatan ug dinaliang medikasyon.
