PAGADIAN CITY-KAPIN kun kulang 14 milyones pesos ang nadala sa mga kawatan human gilungkab ang duha ka Jewelry stalls nga nakapwesto sulod sa Gaisano Capital Mall, Brgy. San Pedro, Pagadian City, mga alas 2:45 sa kadlawon, Hulyo 31, 2025.
Sa inisyal nga imbestigasyon sa Pnp Pagadian, basi sa nakuha nga CCTV footage sa maong mall, tulo ka mga wala mailhing suspetsado ang nanglungkab sa maong alahasan agi sa tunnel sa groundfloor nga nakakonekta sa usa ka pharmacy nga anaa sulod sa mall.
Duha ka Jewelry store ang gisulod sa mga suspetsado diin upat ka mga vault ang pugsanon nga gi-ablihan hinungdan nahurot paglimas sa kawatan ang mga alahas, ug kwarta nga anaa sulod sa maong mga vault.
Matud ni LTCOL Jerwin S. Cagurin, hepe sa Pagadian City Police Station naglusad na sila ug makuting imbestigasyon pinaagi sa tabang sa Scene of the Crime Operatives (SOCO) alang sa pagsulbad sa kaso.
Samtang gikasa na sab sa Pagadian City Police Station ang manhunt operation alang sa posibleng pag-ila ug pagdakop sa mga suspetsado nga misibat human sa panghitabo.
