IPIL- Malampuson nga naluwas sa mga personahe sa Ipil Municipal Fire Station ang mga estudyante ug drayber sa usa ka school bus nga na-stranded tungod sa kusog nga pagbaha sa Barangay Taway Ipil niadtong nakalabay nga adlaw.
Ang nahisgutang pagresponde gipasiugdahan ni FSINSP Herman I. Ting, CE, MPA, ang Municipal Fire Marshal, uban sa mga duty personnel sa Shift A sa Ipil MFS nga inabagan sa Local Disaster Risk Reduction and Management Office (LDRRMO) ug mga opisyal sa Barangay aron dali nga mahatagan og tabang ang mga biktima.
Pag-abot sa lugar sa insidente, gihimo gilayon ang on-scene assessment aron masuta ang pinakaluwas ug epektibong pamaagi sa pagluwas tungod mitaas ang lebel sa tubig hinungdan nga dili makasulod ang mga sakyanan.
Migamit ang rescue team og rope system aron makalabang padulong sa bus ug gipahimutang ang hagdanan aron hapsay nga ma-evacuate ang mga estudyante lakip ang driver.
Tungod sa koordinadong lihok sa Ipil MFS, LDRRMO, ug Barangay officials, nagmalampuson ang operasyon sa maong dapit. Nag-awhag ang hingtungdang ahensya nga magmatngon ug mangandam kanunay batok sa peligro nga dala sa pagbaha ug uban pang mga kalamidad.
Source:Ipil MFS
