𝗗𝗨𝗟-𝗔𝗡 𝗦𝗔 𝟭𝗠 𝗞𝗔 𝗙𝗜𝗟𝗜𝗣𝗜𝗡𝗢 𝗔𝗡𝗚 𝗡𝗔𝗞𝗔𝗕𝗘𝗡𝗘𝗣𝗜𝗦𝗬𝗢 𝗦𝗔 𝗣𝟮𝟬/𝗞𝗜𝗟𝗢 𝗡𝗚𝗔 𝗕𝗨𝗚𝗔𝗦 – 𝗗𝗔

Dul-an sa usa ka milyon ka Pilipino ang nakabenepisyo sa P20 matag kilo nga bugas sa administrasyon ni Presidente Ferdinand Marcos Jr.

Matod sa Department of Agriculture (DA), niabot na sa 2,105 metriko tonelada (MT) nga barato nga bugas humay ang nabaligya sa kapin 200,000 ka panimalay, base sa datos niadtong Hulyo 14, 2025.

Sa pagkakaron, ang P20/kilo nga bugas anaa na sa 162 sa 699 ka operational Kadiwa ng Pangulo (KNP) centers ug tindahan sa tibuok nasod.

Dugang mga lokal nga kagamhanan ang gikatakdang mopatuman sa maong programa.

Matod ni DA ASec. Arnel de Mesa, target nga makabenepisyo ang mga 15 milyones ka benepisyaryo sa nasangpit nga programa.

Ang barato nga bugas nga gibaligya ubos sa programa sa gobyerno nga Benteng Bigas Meron Na para sa mga senior citizens, persons with disabilities (PWDs), solo parents, benepisyaryo sa Pantawid Pamilyang Pilipino Program (4Ps) ug Walang Gutom Program, apil na ang minimum wage earners.

Ang P20/kilo nga bugas usa lang sa mga lakang sa gobyerno aron mapagaan ang presyo sa bugas aron masiguro ang kaayohan sa publiko.