ILIGAN CITY- Arestado ang usa ka babaye sa gihimong follow-up operation sa Iligan City Police Station 4 human malambigit sa pagpangawat sa usa ka tindahan sulod Robinsons Place sa Barangay Tubod, sa may alas 3:40 sa hapon niadtong Hulyo 14, 2025.
Basi sa report gikan sa Police Station 4, giila ang suspek nga 25 anyos babaye ug temporaryong residente sa Barangay Suarez, dakbayan sa Iligan.
Sa inisyal nga gihimong imbestigasyon alas 10:00 sa buntag niadtong Hunyo 13, 2025 midangop sa prisinto ang usa ka complainant arun sa pagpangayo tabang sa kapolisan kalabot sa nawala nga salapi sulod sa usa ka Cashier drawer nga nagkantidad ug Php 67,200.
Diha-diha dayon mihimo ug imbistigasyon sa kapolisan pinaagi sa pag review sa CCTV nga naka install sa nasangpit nga tindahan ug didto nakita ang suspek nga misulod sa lokasyon kon asa nahimutang ang drawer ug didto gikuha ang salapi sulod sa drawer box.
Human sa imbestigasyon dali mihimo ug operasyon ang kapolisan nga miresulta sa pagkaaresto sa suspek ug nasakmit gikan mismo sa iyang panuyanan ang resibo sa grocery, ang duplicate nga yawi sa tindahan ug ang Php 61,300.
Sa pagkakaron, ang arestadong suspek temporaryong gibalhug sa Iligan City Police Station 4, samtang gihikay ang tukmang lakang batok kaniya.
