TAGUM CITY- Nasikop sa mga awtoridad ang 29-anyos nga babaye, giila sa alyas nga “Boss” usa ka street level individual, nga residente sa Purok 2B, Barangay Salvacion, Panabo City Davao del Norte. Ang drug buy-bust operation gipahigayon niadtong nakalabay nga gabii sa Panabo City Davao del Norte, tungod sa paglapas sa R.A 9165 kon Comprehensive Dangerous Drugs Act of 2002.
Sumala pa alas 7:55 sa gabii, gipahigayon ang hiniusang operasyon sa mga operatiba sa Panabo City Police Station, uban ang 2nd Davao del Norte Provincial Mobile Force Company ug Philippine Drug Enforcement Agency kon PDEA Davao del Norte sa Purok 3, Barangay New Visayas sa nahisgutang lungsod ug probinsiya.
Ang operasyon gihimo ubos sa pre-operation nga may nakadokit nga clearance number. Nakuha sa mga awtoridad gikan sa suspek ang mosunod nga mga butang, Usa ka heat-sealed transparent sachet nga adunay sulod nga puti nga crystalline substance nga gidudahang shabu; usa ka dugang sachet sa gituohang shabu; usa ka 500 peso bill nga adunay serial number nga gigamit isip marked money; ug usa ka tribal-design nga coin purse.
Matod pa sa kapulisan, ang kinatibuk-ang gibana-bana nga gibug-aton sa nasakmit nga butang anaa sa 0.2208 gramos, nga adunay Standard Drug Price nga Php 1,501.44.
Ang suspek ug ang tanang nakumpiska nga mga butang anaa na sa kustodiya sa kapulisan alang sa saktong disposisyon ug pagpasaka sa tukmang kaso.
