Nasakapan ang usa ka lalaki gikan sa Zhongnan University of Economics and Law sa Wuhan, China nga nagsul-ob og sinina sa babaye aron magkuha og pasulit sa usa ka babaye nga estudyante.
Sumala sa taho, ang babayeng estudyante nga giila lang sa iyang apelyido nga “Li” maoy mibayad sa lalaki nga suspek aron magpakaaron-ingnon nga si “Li” ug motake sa Advanced Accounting exam. Ang suspek nagsul-ob og wig ug face mask, aron masundog ang hitsura ug sininaan ni Li.
Sa venue sa eksaminasyon, usa ka proctor ang nakaamgo nga peke ang iyang buhok ug mimando kaniya nga tangtangon ang wig, nga wala gituman sa suspek. Adunay nahitabong komosyon, hangtod nga usa ka examineer ang nakaila sa suspek, ug daling misibat kini palayo sa lugar.
Ang unibersidad nag-isyu sa usa ka pahayag nga nagpamatuod sa insidente ug nag-ingon nga si Li mahimong mapalagpot tungod sa paglapas sa anti-cheating policy. Ang tunghaan ug lokal nga awtoridad nagpahigayon ug nagsusi sa pagkatawo sa maong lalaki.
Ang balita nakaabot sa mga Chinese netizens, nga nagpasiugda sa grabe nga pressure sa mga estudyante aron makab-ot ang taas nga mga marka sa eksaminasyon. Ang uban miingon nga ang pagpalagpot usa ka dakong hampak sa kaugmaon ni Li sa maong unibersidad.
