TAGUM CITY- Gipusil patay ang usa ka menor de edad sa syudad sa Tagum. Giila ang biktima nga si alyas Win, 17 anyos, residente sa Lopez Compound, Brgy. Mankilam sa nahisgotang syudad, pasado alas tres sa kadlawon Hulyo 8, 2025.
Subay sa inisyal nga impormasyon gikan sa Tagum City Police Station, naabtan na lamang sa operatiba ang nagbuy-od nga patayng lawas sa usa ka lalaking biktima nga nagsuot ug itom nga T-shirt og brown nga short dapit sa kahoy nga crates sa Bagsakan area, Vegetable Section, Tagum City Public Market, Brgy. Magugpo West.
Base sa saysay sa testigo nga si alyas Jess, nga samtang nag-arrange sa iyang mga produkto ang biktima, iyang nakita ang usa ka wala mailhing lalaki nga naka-kalo ug naka puti nga T-shirt nga miduol, dayon pusil niini og daling misibat sa wala matino nga direksyon.
Narekober sa mga personahe sa Davao Norte Provincial Forensic Unit sa scene of the crime ang duha ka basiyo sa bala sa .45 nga armas. Ang nahisgotang biktima nakahiagom og duha ka mga samad pinusilan sa ubos nga bahin sa iyang suwang nga matud pa maoy hinungdan sa iyang hinanaling kamatayon.
Samtang ang kapulisan sa Tagum City Police Station nagpahigayon na ug hot pursuit og dragnet operation aron sa pag-track down sa maong suspetsado ug posibleng pagkasikop niini.
