Nasikop sa gihimong buy-bust operation sa kapulisan ang usa ka tricycle driver sa Barangay San Jose, lungsod sa Imelda, Zamboanga Sibugay, pasado alas-4:50 sa hapon niadtong Nobyembre 20, 2026.
Naila ang nadakpan nga usa ka hamtong nga lalaki, ulitawo ug residente sa lungsod sa Alicia, Zamboanga Sibugay. Ang operasyon gipahigayon sa mga operatiba sa Municipal Drug Enforcement Team o MDET sa Imelda Municipal Police Station.
Nakumpiskar gikan sa suspek ang lima ka gagmayng pakete nga gituohang shabu nga adunay gibana-banang gibug-aton nga 2.595 gramos ug Standard Drug Price nga nagkantidad sa Php 17,646.00. Nakuha usab ang 500 pesos nga gigamit isip marked money ug usa ka itom nga pitaka.
Gidala ang nadakpang suspek sa Imelda Municipal Police Station alang sa dokumentasyon ug hustong disposisyon, samtang ang mga nakumpiskang gidudahang ilegal nga droga dad-on sa Zamboanga Sibugay Provincial Forensic Unit alang sa qualitative examination.










