Gipahinumdoman ang tanang benepisyaryo sa ika-upat ug ikalimang batch sa Free Student Driver’s Licensing Program nga motambong sa libreng Theoretical Driving Course o TDC karong Lunes, Nobyembre 23, 2026, alas-una sa hapon.
Gipahibalo nga ipahigayon ang seminar sa Capitol Atrium, Provincial Capitol, Ipil, Zamboanga Sibugay, diin gikinahanglan ang pagtambong sa tanang nakalista nga benepisyaryo sumala sa gitakdang oras.
Gipahimangnoan usab ang mga benepisyaryo nga kinahanglan nga sayo silang moabot aron malikayan ang pagkalangan. Gipasiugda nga mandatory ang attendance ug ang dili makatambong sa gitakdang schedule awtomatikong mawad-an sa ilang slot, nga igahatag ngadto sa laing kwalipikadong benepisyaryo.
Tumong sa maong programa nga dili lamang makahatag og libreng Student Permit, kondili masiguro usab nga ang mga bag-ong drayber adunay igong kahibalo bahin sa balaod sa trapiko, responsableng pagmaniho ug kaluwasan sa kadalanan. Gihangyo usab ang tanan nga ipakaylap ang maong pahibalo aron makaabot kini sa tanang benepisyaryo sa ika-upat ug ikalimang batch.










