Gipalig-on sa lokal nga panggamhanan sa Borongan City, Eastern Samar ang mga lakang sa pagpangandam batok sa posibleng linog ug tsunami pinaagi sa tabang sa Japan International Cooperation Agency (JICA) ug Department of Science and Technology-Philippine Institute of Volcanology and Seismology (DOST-Phivolcs).
Lakip sa mga proyekto ang paghimo og tsunami inundation simulation, hazard maps ug komprehensibong plano sa pagbakwit aron maandam ang siyudad sa posibleng epekto sa tsunami.
Nakigpulong na ang mga eksperto sa JICA ug mga opisyal sa lokal nga panggamhanan sa Borongan aron hisgotan ang pagpatuman sa maong proyekto, lakip na ang pagpalambo sa sistema sa pagbantay ug pagpakaylap sa impormasyon panahon sa kalamidad.
Gikonsiderar nga delikado sa tsunami ang Borongan City tungod sa kaduol niini sa Philippine Trench, diin posibleng mahitabo ang linog nga mokabat sa magnitude 8.1.
Gibanabana nga ang maong kusog nga linog posibleng makapahinabo og tsunami nga adunay balod nga moabot sa walo hangtod napulo ka metros ang gihabogon.
Samtang, gipasiugda ni Borongan City Mayor Jose Ivan Dayan Agda ang kamahinungdanon sa aktibong partisipasyon sa mga komunidad, ingon man ang pagpahigayon og regular nga pagbansay aron mapalambo ang kahibalo ug kahandam sa mga residente batok sa linog ug tsunami.
Photo courtesy: Borongan City Information Office










