Nakadawat og Katarungang Pambarangay Model Award ang Barangay Alta Vista sakop ning dakbayan sa Ormoc atol sa gipahigayon nga RAYHAK 2026 isip pag-ila sa epektibo nga pagpatuman niini sa sistema sa paghusay sa mga panagbangi sulod sa komunidad.
Tumong sa maong pasidungog ang pag-ila sa mga barangay nga malampusong nagresolba sa mga panaglalis pinaagi sa malinawon nga pamaagi ug nagpalig-on sa maayong relasyon sa mga residente.
Gihatagan usab og Lupon Lingkod Award si Punong Barangay Dinah G. Larino ug Barangay Secretary Divina P. Sagales isip pag-ila sa ilang serbisyo ug kontribusyon sa pagpatuman sa Katarungang Pambarangay.
Samtang, padayon nga naghatag og teknikal nga suporta, monitoring ug mga training ang Department of the Interior and Local Government o DILG aron mapalig-on ang sistema sa paghusay sa mga panagbangi ug pagmintinar sa kalinaw ug kahusay sa matag komunidad.
Photo courtesy: DILG Ormoc City Field Office










